Төрийн албан хаагчдын хариуцлага, чадвар чадавх, ёс зүйн байдлыг үнэлэх арга зүй, аргачлал

Төрийн албан хаагчдын хариуцлага, мэдлэг чадвар, ёс зүйн байдлын талаар иргэд хэрхэн үнэлж буйг судлан, үнэлгээг индексийн аргаар тодорхойлсон арга зүй, аргачлалыг эл өгүүлэлд авч үзэв. Төрийн албан хаагчдын хариуцлага, мэдлэг чадвар, ёс зүйн байдлыг 3 багц шалгуур үзүүлэлтээр тодорхойлж, иргэдээс судалгаа авч үнэлүүлэн, мэдээллийг боловсруулж, дэд индекс, нэгдсэн индексийг тооцсон. Индексийн шалгуур үзүүлэлтийг a) судалгааны ажлын зорилго, сэдэв, зарчимд нийцсэн байх, б) мэдээллийг цуглуулахад хялбар байх, в) найдвартай байдлыг хангасан байх, г) хэмжүүр үнэлгээний суурь зарчимд суурилсан, үнэлэх боломжтой байх гэсэн хүчин зүйлийг харгалзан үзэж боловсруулсан болно. Үзүүлэлт тус бүрийн индекс болон хариуцлага, чадвар чадавх, ёс зүйн дэд индекс, эцэст нь төрийн албан хаагчдын хариуцлага, чадвар чадавх, ёс зүйн нэгдсэн индексийг дүүрэг бүрээр болон хотын хэмжээнд тооцоолсны эцэст амьжиргааны түвшний баталгаажих түвшнээс дээгүүр ба доогуур бүлэг, гэр хороололд амьдардаг, орон сууцны хороололд болон холимог хороололд амьдардаг иргэд, тусгай дунд, түүнээс дээш, бүрэн дунд, түүнээс доош боловсролтой бүлгээр харьцуулан шинжлэв.